Музей ҡомартҡылары телгә килһә...

Атай-олатайҙарыбыҙ ҡалдырған рухи, матди, мираҫ сатҡылары һәр беребеҙҙең күңелендә йәшәй. Әммә ошо байлыҡты йыйып, өйрәнеп, башҡаларға еткереүҙе маҡсат итеп алыусылар аҙ.

Башҡорт гимназия-интернатының этнопедагогика музейы эргәһендә эшләп килгән “Аманат” түңәрәге ағзалары ошо изге бурысты үтәйҙәр. Түңәрәккә йөрөүсе уҡыусыларҙың йылды йомғаҡлау сараһы ошо турала һөйләй. Уҡыусыларыбыҙ Мөхәмәтйәнов Нургиз, Аҙнабаев Данияр, апайлы-һеңлеле Зарина һәм Мәҙинә Һәҙиәтуллиналар, Барышникова Карина, Искәнйәрова Яҙгөл ярҙамында музей экспонатттары телгә килде. Өләсәй һандығынан сыҡҡан ҡашмау, ҡушъяулыҡ, сәсҡап һ.б. милли биҙәүестәр, өй түрендә эленгән бишек тураһында байтаҡ мәғлүмәт алды сарала ҡатнашыусылар. Ә егеттәрҙең башҡорт аты, эйәр, сергетыш, даға һ.б. ат егеү кәрәк-яраҡтары тураһындағы сығыштарынан милли рух, фәһем алып таралыштылар.