ҮҘ ТЕЛЕМДӘ ҺӨЙЛӘШӘМ

Үҙ телемдә һөйләшәм -
Миңә ҡоштар көнләшә.
Үҙ телемдә һөйләшәм -
Мин ҡояшҡа тиңләшәм.

Үҙ телемдә һөйләшәм –
Бар булмышым нур ғына.
Үҙ телемдә һөйләшәм –
Күңелкәйем йыр ғына.

Һәр һүҙ миңә сәскә төҫлө,
Һәр һүҙ – йәйғор киҫәге.
Шатлығымдың юҡ сиге,
Юҡ шатлығым иҫәбе.

Үҙ телемдә һөйләшәм,
Үҙ илемдә көн күрәм,
Күңелемә шатлыҡтан,
Кинәнестән нур һүрәм!
(Д.Талхина)
Иҫәнғол башҡорт гимназия – интернаты коллективы #Башҡорт теленән халыҡ – ара онлайн диктантта# дәррәү ҡатнашты.Был сарала тотош ғаилә менән яҙыусыларҙың байтаҡ булыуы, һәр кемдең эшкә етди  һәм ихлас тотоноуы уның мәртәбәһен тағы ла арттырҙы.  Донъялағы һуңғы араларҙағы хәл- ваҡиғалар тере аралашыуҙарҙы сикләгән мәлдә араларҙы яҡынайтты, башҡорт халҡының берҙәмлеген раҫланы ғына ул байрам!
  Күптәребеҙҙең олатайҙары Бөйөк Ватан һуғышында атлы ғәскәрҙәрҙә хеҙмәт иткәндәр.Тексты  яҙған ваҡытта яугир ҡартайҙарыбыҙҙың  һыны күҙ алдыбыҙҙан китмәне…